O le 38 tausaga ua mavae sa asiasi mai ai i Samoa le ulugalii mai Melepone i Ausetalia o David ma Carol Williams, e le’i vaaia i ni fale e ta’i tolu ni fogafale i Samoa.

O le la vaaiga lea i le tausaga e 1985 sa malaga tafafao mai ai i le atunuu i se meli la’upasese ma nonofo ai mo aso e fā o le la honeymoon ina ua faato’ā uma ona faapa’ia i le sakalameta o le faaipoipoga.

O lea tausaga na mua’i asiasi ai i Samoa sa tele ina savavali tagata auā e le to’atele nisi e iai ni taavale se’ia vaganā pasi sa malaga ai.

O le taimi nei ina ua toe afea lo tatou atunuu e le ulugalii ua telē le suiga i fale ma auala o feoa’iga aemaise o fesoota’iga.

Peita’i o le la molimau e lē o suia lava o loo tumau uiga tausaafia ma le alolofa o o tatou tagata.

O le meli la’upasese o le Norwegian Sun Cbriuise liner sa afea Apia i le Aso Lua o lenei vaiaso na toe malaga asiasi mai ai i lo tatou atunuu David ma Carol, ma o se fiafiaga tele lea ia i la’ua ua toe faamanatu le talavou o le olaga ina ua faato’ā faaipoipo ma tafafao mai i Samoa i le 38 tausaga talu ai, ae o lea ua toe vaai ma silasila i le aulelei ma le matagofie o Samoa ae ua matutua le soifua.

E 1,800 le pasese a le meli o le Norwegian Sun sa afea lo tatou atunuu o se tasi o alagatupe mai le atina’e o tagata tafafao i Samoa.