Ua i lalo nei i le vaavaaiga a leoleo se alii e 44 tausaga le matua; o loo faamauina le tele o moliaga e ono molia ai o ia ona o gaioiga na ia faia i le taeao o le aso ananafi i faaitu o Pakuranga.
I lipoti e tusa ai ma se pepa o faamatalaga a le ofisa o leoleo, le Counties Manukau Police, na ta’ua ai o lenei alii o loo tuua’ia i le talepe fale, e pei ona lipotia mai e nisi o aiga; ma e faapea e 7 lelei maota ma laoa na aga’i iai lenei alii ma faia ai gaioiga faasolitulafono o le talepe fale ma gaoia ai ni taavale, e faamauina na lavevea uma nei taavale ia te ia.
Faamauina pe tusa o le 10 minute e te’a ai le itula e 5 aga’i i le 5:50 i le vaveao o le Aso Sa, na faatino ai e lē ua taofia nei soligatulafono.
Ta’ua i lipoti, na vaalau atu le ofisa o leoleo mo se fesoasoani i se tasi o fale o loo i le auala o Udys Road, ma faailoa atu o loo iai se tagata ua sao atu i totonu o lo latou fale, ma sa iai se isi tagata na pa’i lima ma lē o loo tuua’ia nei.
Ua ta’ua e le’i iai se isi na aafia i lea feeseesea’iga, ae na aga’i ese le alii 44 tausaga le matua ma aga’i atu i le isi fale ma faatino ai lava gaioga o le talepe fale ma ave faamalosi taavale a aiga.
I le to’atele o aiga na valaau atu i osofa’iga na faasolo ai loa sa’ili’iliga a leoleo e faaaogā ai maile sosogi i faaitu o loo aafia, ina ua oo atu le latou sa’iliga i Grammar School Road ae oo atu loa le valaau, o lea ua oo atu i se tasi o fale ma e faapea, na kiki i lalo e lea alii le faitoto’a o le fale ma amata faaleaga le tele o meatotino i totonu, i le uma ai ona ia faaleaga o meatotino o lea fale, na ia gaoia ai loa le ki ma ave faamalosi ai loa le taavale.
Na faaleagaina lea taavale i le magafā Udys Road ma Reeves Road.
Na ia gaoia ai lea o se isi taavale ma o i na tuliloaina ai e leoleo le taavale.
Ua lipotia na faaleagaina foi lea taavale.
Na sola ese le alii 44 tausaga ae na tuliloa atu lava e leoleo ma maua ai i luga o le auala.
Ona o nei gaioiga e telē le avanoa e tele ai moliaga e ono molia ai lē ua taofia.
Ma o le a tula’i o ia i luma o le faamasinoga i se taimi o i luma.
