Ua faailo e le sui i le E tū Union, le matua’i telē o aafiaga o le tuuina mai ai o se tulafono e pei ona faalauiloa i le vaiaso na se’i mavae atu nei, o le mafai ai lea e i latou e ona ma pulea galuega ona tipi totogi o tagata faigaluega pe afai ae tetee i nisi o vaega e tusa ai ma le faatautaiga o galuega.
Ta’ua e le iuni, le lē talafeagai o lenei tulafono, ona i lona manatu, o le a vaaia le matua’i aafia ai o tagata Pasefika, ona o lea le itu, o le to’atele o tagata Pasefika o loo totogi i le totogi auptio maualalo i totonu o Niu Sila, poo le minimum wage.
Faamauina i lipoti, i le pasia ai o le Teuteuga o Tulafono tau i Galuega, Employment Relations Amendment Act, le tuuina atu ai i ē onaina galuega ma pule o fale faigaluega e latou te tipia ai le oo atu i le 10% o totogi o ana tagata faigaluega e tetee i le faatautaiga o galuega e pei o ova taimi ma isi.
Ta’ua e le E tū Union, Fala Haulangi e lē talafeagai lea tulafono mo o tatou tagata Pasefika, ona o se tulafono ua faaali mai ai le lē alolofa o le malo ma le pasiaina o lenei tulafono.
Ona o lea le itu, o le tetee poo le partial strike e pei ona faatino iai lea fuafuaga, e faia e le tagata faigaluega pe afai o iai sona iloa i le lē saogalemu ma le lē malupuipuia o ni vaega o loo vaaia i totonu o le lotoifale o fale faigaluega ae o lea o le a taofiofi ai fua le aiā tatau a le tagata i le maua ai o lana totogi.
Ua faailoa foi e Fala Haulangi o se faasagatau lea a le malo i nai tagata Pasefika, o ē ua afu le tautua i totonu o fale faigaluega.
Ae faamanino e le Minisita o Workplace Relations, Brooke van Velden, o lea tulafono na fausia ma tuufaatasia ina ia maua se sologa lelei o le faatautaiga o galuega i totonu o fale faigaluega e aunoa ma ni faafitauli.
Puna o Faamatalaga: https://pmn.co.nz/read/business/new-pay-cut-law-poses-threat-to-pacific-workers-union-calls-out-unfairness
