Ua teena moliaga o le fasioti tagata faamoemoeina e le alii o Semisi Aliimatafitafi, e aofia ai ma isi moliaga o loo faasaga atu i lea alii e tauala atu i lana loia le tamaitai o Tanya Toailoa.

Ua tuuina atu lea mataupu i le aso tolu o Iuni o le tausaga nei e fofoga ai mau i luma o le faamasinoga.

Ua poloaiina foi lea alii e le alii faamasino ia Fepuleai Ameperosa Roma ina ia tuuina atu uma ana talosaga o loo fia tuuina atu i le faamasinoga i lana loia o loo tulai mo ia.

O Semisi na molia e leoleo i se faalavelave na tulai mai i Faatoia ma uma ai le ola o se tagata.

O moliaga e iai le fasioti tagata faamoemoeina, fasioti tagata pa’ivalea, o le umia o se aupega matautia, o le faapāina o se laaumalosi, umia o se auupega e lē faatagaina ma le umia o ututau.

O le amataga o le masina na faailoa ai e le alii e manao e tulai lava ia mo ia lava ae ua lē toe manao i sana loia.

O loo nofo taofia pea lea alii i le vaaiga a leoleo seia aulia le aso e valaau ai lona faamasinoga.