I le masina o Aperila na maua ai i sa’iliga a leoleo le alii o Toese Tuuaga poo Toese Neemia Tuuaga sa sa’ilia i se tusi saisai ona o le lē tula’i i le faamasinoga, aemaise o se gaioiga solitulafono sa tula’i mai i le malaevaalele i Faleolo na faapāpā ai se laaumalosi, o lea ua toe faaauau ona nofo taofia Toese i le vaaiga a leoleo i le falepuipui i Tanumalala, e faatali ai le masina o Aokuso e su’esu’e ai nisi o ona moliaga.
O lea taulealea e tusa o faamaumauga a le faamasinoga sa faamaonia ni ona moliaga tau soligatulafono i Niu Sila ma o le mae’a o tuli o ona faasalaga na toe tipoti ese ai ma aumai i Samoa, lea o loo iai ma le tapu e lē mafai ona toe ulufale i Niu Sila.
O loo ta’ua foi i faamaumauga a le faamasinoga o se tasi sa i totonu o le kegi o le Mongrel Mob i Niu Sila.
O loo tuua’ia o ia i moliaga tau i le umia o se laaumalosi, umia o ututau ma le faapāpā o se laaumalosi e lē faatagaina faaletulafono i Samoa, ma o loo ia teena uma ia moliaga a leoleo.
O lana talosaga e ala atu i lana loia e tatala i tua i ni aiaiga e faatali ai Aokuso mo lona faamasinoga ua lē talia.
O le sa’iliga a leoleo na maua ai i le masina o Aperila na pu’eina ai ma molia e leoleo ni tagata se to’afitu ona o tuua’iga i lo latou fesoasoani e faalafi Toese ae o loo fia maua e leoleo mo su’esu’ega.
