O Iuni o le tausaga na te’a nei na faia ai le faai’uga a le tamaitai faamasino o le Faamasinoga Maualuga le afioga Leutele Niavā Mata Tuatagaloa, na ia teena ai le talosaga a Talalelei Pauga e ala i lana loia, ina ia faasee ese mai le tauaveina o su’esu’ega o moliaga o Talalelei ona e pito tasi lona faafoeina o le matāupu.
O lea faai’uga a le faamasino ua saga faamausalī i se finagalo o le Faamasinoga o Talosaga na toe apili iai e Talalelei le faai’uga a le tamaitai faamasino.
Faaalia e le Faamasinoga o Talosaga e na te teena le apili ona e leai se malosi’aga o le Faamasinoga o Talosaga Apili e ioilo ai se faai’uga a se faamasino na te teena lona faasee ese mai le su’esu’eina o se matāupu tau faamasinoga.
Ae i le silasila a lea faamasinoga o mau sa tuuina atu e faavae ai le apili e leai ni vovoga pe no merits.
Na pau le vaega sa faatonuina e lea faamasinoga i lana faai’uga, e iai le aiā tatau o Talalelei Pauga na te silafia ai taualumaga o su’esu’ega a le faamasinoga i isi alii e to’atolu o loo tuli faasalaga i moliaga o le taupulepule e faaoo le maliu i lē sa avea ma Palemia.
O le moliaga foi lea o loo molia ai Talalelei Pauga.
