O loo teena e le Minisita o A’oga, Erica Stanford ni tuua’iga e faapea ua faaitiitia e le faigamalo le ta’ua poo le faaaogā o tusitusiga i le Treaty of Waitangi mo le talanoaina ma le a’oa’oina i totonu o a’oga.
E tele taimi na faailoa ai e pule o a’oga faapea foi faia’oga i le RNZ, ua maitaulia lava le faaitiita o upu Maori ma tusitusiga e faasino atu i le Treaty of Waitangi o loo toe faaaofia i polokalame poo matāupu a’oa’oina i a’oga.
I se fonotaga na faia i Ueligitone i le vaiaso nei, na faailoa atu ai ia i latou na auai nisi o suiga ua ono lamatia ai le ono faatuatuana’i o polokalame tau Maori, ma ma’umau ai le mau fuafuaga sa faataatitia ma faagasolo mai mo le tele o tausaga.
Ae na matuā tūtūaai Standford e teena na lipoti ma tuua’iga.
Saunoa le Minisita, o loo avatu pea le faatāua a le malo i le treaty poo le feagaiga lea i Waitangi, ma o le faatāua lea ua taumafai ai ina ia siitia i luga mea e mafai ona ausia e fanau a’oga a Maori.
Ua leva o iai pea le va mamao lea i mea o loo mafai ona ausia e fanau a’oga Maori pe a faatusa atu i tamaiti mai isi atunuu ma e lē o se tulaga lelei lea.
O la’u galuega lea o se minisita, ina ia faaitiitia le va lea o loo iai, ma e iai vaega o loo o’u taumafai e toe fetuuna’i ma fesuia’i ina ia mafai ai ona ausia na suiga i se tulaga lelei.
O se tasi o vaega o le saunoaga a le tama’ita’i minisita na ia ta’ua ai, e tatau i faia’oga ona latou sa’ili lelei ia iloa poo ai tonu o loo faia suiga i le tomatau poo le polokalame o loo faagasolo ai a’oa’oga, ma le mafua’aga ua faia ai suiga.
Puna o Faamatalaga: https://www.rnz.co.nz/news/political/572058/minister-of-education-erica-stanford-rejects-claims-treaty-being-removed-from-school-documents
