E lē o talia e faia’oga o a’oga tulagalua a le atunuu le ofa a le malo mo le siitaga o latou totogi, ma ua amata faagasolo ai nei a latou faatalanoaga mo le solo tetee a faia’oga i se taimi e lē o toe mamao.
O le NZ Herald i le taeao nei sa faatalanoa ai e le sui o le Herald, Ryan Bridge, se sui o le asosi o faia’oga i le atunuu, le alii faia’oga o Liam Rutherford ma ta’ua ai e Rutherford, ua aga’i lava manatu o le atunuu e faapea ua tagisā tele faia’oga i totogi e peiseai na o totogi poo tupe lava ia e finau mai ai, ae o le mea moni e tele isi vaega ia o loo latou finau ai i le faigamalo ina ia taga’i iai, e pei o vaega ina ia faafaigofie ma lelei le faatinoga o galuega a faia’oga, ma maua ai le lagona fiafia e faatino galuega, e pei o le lava o resources poo puna’oa e faatino ai galuega a faia’oga, ia lava le aofa’i o faia’oga e galulue, e pei o le lava o ni faia’oga fesoasoani poo teacher aids i potua’oga ta’itasi ina ia tau faamāmā le avega a faia’oga autū.
Sa tulituli e le sui o le Herald le alii faia’oga pe o le a lē manana’o la faia’oga i ni siitaga o latou totogi pe afai e saunia uma e le faigāmalo nisi faia’oga lagolago mo vasega ta’itasi, ae sa maumaua’i pea le tali a le alii faia’oga, o lagona sa aoao uma mai faia’oga i le atunuu atoa, ua latou ioe ai, e lē o lava ma atoatoa atu le tali a le malo mo le faaleleia o vaega uma o loo moomia e faia’oga e faatino ai a latou galuega, e aofia ai foi la ma siitaga o latou totogi, ma ia faaopoopo le aufaigaluega e ala i le faatulaga o totogi lelei e faaosofia ai le naunau o nisi e fia avea ma faia’oga.
O le a tulimata’i pea la lenei matāupu poo fea o le a aga’i iai le finagalo o le asosi o faia’oga aemaise i le tulaga o solo tetee e pei ona faaolioli mai.
Puna o Faamatalaga: https://www.nzherald.co.nz/nz/primary-teachers-reject-governments-pay-offer-will-vote-on-strike-action/3MEV46M5D7DMLFFVZGEYJSQ3OY/
