Ua faailoa lautele i auala o fesoota’iga televavave le social media nisi o sui faatutū o le palota tele ia Aokuso, e aofia ai se tamalii sa galue i le malo i le tele o tausaga ma sa avea ma Ofisa Sili o le Matāgaluega o Tupe a le Malo i ni tausaga, le tofa Lavea Tupa’imatuna Iulai Fiso Lavea Loia.
O loo faalauiloa lona avea ma sui tauva tuto’atasi mo le nofoa o le itumalo faapalota o Gagaifomauga 1 lea sa tula’i ai le tofa Faimalotoa Kika Stowers Ah Kau.
O se isi tamalii o loo sauni e tauva tuto’atasi o le susuga Motuopuaa Seve Henney Henry Afeleti Bourke Papalii, o se faipisinisi ae o se matai tausi aiga foi.
O le a tauva o ia i le nofoa o le itumalo faapalota o Vaisigano 2 lea sa tula’i mai ai le afioga Valasi Luapitofanua Toogamaga Tafito Selesele o se tasi o minisita o le kapeneta o le malo tausi o le a tauva i le fu’a a le pati faaupufai o le Samoa Ua Potopoto.
