O le Minisita o Fesoota’iga ma Faamatalaga faatekonolosi o le malo tausi lea sa sē’ei i le nofoa o le itumalo faapalota o Vaa o Fonoti, le tofa Mau’u Atiifale Siaosi Pu’epu’emai, e ui sa faailoa muamua lona ata i auala o fesoota’iga a le vaega faaupufai o le Samoa ua Potopoto o le a tauva ai, peita’i o lea ua faailoa e se molimau faatuatuaina ua suia i le avea ma sui e tauva tuto’atasi poo se independent election candidate.
E le’i manuia sa’iliga i le fia maua o se finagalo o le tofa Mau’u, ae ua faailoa e ni molimau, o le tauva ai faatuto’atasi o lea tamalii o le finagalo lea o sui lagolago i lona itumalo.
E to’afā sui faaolioli ua lesitala suafa mo le filifiliga a le Vaa o Fonoti e aofia ai se tama’ita’i.
O loo tauva ai sui o le vaega faaupufai e puipuia aiā tatau a tagata sa tauva i le palota laitiiti a lea itumalo i le paea’iga ua faatā’ape le tofa Leausa Take Naseri.
O le palota laitiiti lea na toe manumālō ai le tofa Mau’u ma avea ai ma sui faipule o le Faatuatua i le Atua Samoa ua Tasi, ina ua lē toe avea ma sui lagolago o le vaega e puipuia aiā tatau a tagata sa tauva ma manumālō ai i le palota tele o le 2021.
O le taufetuliga a sui tauva ua lesitala mo le faigā filifiliga a lea itumalo i le masina fou, o loo iai foi le sui tauva o le vaega faaupufai o le Faatuatua i le Atua Samoa ua Tasi le afioga Fuimaono Tui Vaitolo Ofoia ma le sui tauva tama’ita’i sa tauva muamua i le palota tele o le tausaga e 2021 mo le nofoa lava o lea itumalo palota, le afioga Taumainamoe Aufui Brown.
