Ua toe sauni le tofa Maulolo Tavita Amosa e tauva i le faigā filifiliga aoao a le atunuu mo le nofoa o le itumalo o Sagaga 2, lea sa tula’i ai i le paeaiga 17 a le Palemene ua faata’ape e le’i mae’a le lima tausaga.
Peita’i ua faailoa e lea tamalii o ia o le a lē toe tauva i le fu’a a le vaega faaupufai e puipuia aiā tatau a tagata, ae o le a lagolago i le vaega faaupufai o le Samoa Ua Potopoto le Samoa Uniting Party.
O le fono a lona afio’aga o Afega i le Aso Lua ua mavae e pei ona faailoa e Maulolo Tavita, na maua ai le finagalo o alii ma faipule e tauva i lea pati faaupufai fou o loo ta’ita’i ai le afioga i le tamaitai Palemia o le malo tausi le afioga Fiame Naomi Mataafa.
O mea sa tutupu ma tula’i mai ua faaalia e Maulolo o le mafua’aga lea ua a’e ai se finagalo o lona nuu e suia le vaega faaupufai e tauva ai.
A o tula’i lea tamalii i le tofi o Sagaga 2 sa ia lagolago i le palota o le lua vae tolu na pasia ai teuteuga o le faavae 2025.
Sa palota lagolago foi i le Palemia ma le Kapeneta ina ua tuuina atu le tulafono taufaaofi o le tala autū mulimuli o le tupe lea na teena i le palota e 34 o sui faipule a le vaega faaupufai e puipuia aiā tatau a tagata ma le Faatuatua i le Atua Samoa ua Tasi.
Faaalia e Maulolo Tavita Amosa, o mea na tutupu i le lotoifale o le vaega faaupufai sa lagolago muamua iai faapea ni saunoaga a le ta’ita’i ia te ia, o le a taoto ai i le lotoifale o le vaega faaupufai e puipuia aiā tatau a tagata.
