O le taufetuliga o loo tapena nei iai vaega faaupufai i le sa’ilia ma le filiina o ni o latou sui tauva e faia iai le filifiliga a itumalo, ua lē gata o loo iai sui sa tauaveina tofi faipule o itumalo i le paeaiga ua faatā’ape faafuase’i, ae ua iai ma sui o le taimi muamua lenei ua ulufale ai i le taaloga o upufai o malo e ala i le tauva i le palota.
O le vaega faaupufai e puipuia aiātatau a tagata o lea ua faailoa le momoli atu o le afioga Maualaivao Pepe Seiuli e lona nuu o Malie, ma o le a tauva i le nofoa o le itumalo faapalota o Sagaga 2 lea sa seei ai i le nofoa le tofa Maulolo Tavita Amosa sa lagolago i lea lava vaega faaupufai.
O le afioga Maualaivao Pepe sa avea ma Sui Komesina o le ofisa o Sulufa’iga le Ombudsman ma ua tele tausaga o auauna ma tautua ai i lea ofisa o le malo lea tamalii.
O le tasi o sui faatū o lea vaega faaupufai ua faalauiloa i auala o fesoota’iga a le pati e puipuia aiātatau a tagata sa galue i le malo o le tamalii sa avea ma failautusi o le fono aoao faitulafono le susuga Lima Graeme Tualaulelei.
O le a tauva mo le nofoa o le itumalo faapalota o Vaimauga 4 lea sa tula’i mai ai le afioga Faualo Jeffrey Harry Schuster.
I le vaega faaupufai o le Faatuatua i le Atua Samoa ua Tasi ua faailoa i se tasi o upega tafa’ilagi a lea pati faaupufai, ata o le momoliina atu o le sui tauva o le itumalo o Salega 1 le afioga Tilafono David Hunter.
O le itumalo faapalota lea sa tula’i mai ai le afioga Fepuleai Faimata Su’a lea sa faailoa i le faamanatuina o le 5 tausaga o le Faatuatua i le Atua Samoa ua Tasi, o le a tauva ma nisi sui o lea pati i le nofoa o le itumalo o Faasaleleaga 1 i lona suafa Seumanu.
O Tilafono David Hunter sa avea ma Ofisa Sili o le Matāgaluega o Faato’aga ma Faigafaiva i ni tausaga ua mavae, ae sa avea ma faufautua i le minisita o lea matāgaluega ina ua faasee tuagalu ma le tulaga o le Ofisa Sili.
I tapenaga lava a vaega faaupufai o lea foi ua salalau i auala o fesoota’iga le api o foliga le faailoa o le avea ai ma sui tauva o nisi o tamalii mo le itumalo o Palauli 2 ma Gagaifomauga 2 i le palota tele.
O le afioga Faaolatane Fiu Tuala Iona Pa’ō o le a tauva i le fu’a a le Faatuatua i le Atua Samoa ua Tasi mo Palauli 2 o se itumalo faapalota sa seei mai ai le afioga Leota Laki Sio Lamositele i le tofi faipule o loo sauni foi e toe tauva i le palota i le fu’a lava a lea vaega faaupufai.
O le tasi o sui tauva mai le motu i Savaii o le a tauva i le fu’a a le Faatuatua i le Atua Samoa ua Tasi o le afioga Aiolupotea Misa Tony Aiolupotea o le a finau mo le nofoa o le itumalo o Palauli 3 lea sa tula’i mai ai le tofa Lagaaia Tiaituau Tufuga o le a tauva i le fu’a a le pati faaupufai o le Samoa ua Potopoto ae sa tula’i i le tofi ma manumālō mai i le palota tele o le tausaga e 2021 i le vaega faaupufai o le Faatuatua i le Atua Samoa ua Tasi.
O le itumalo o Gagaifomauga 2 lea sa seei i le tofi faipule le afioga Foisala Lilo Tuu Ioane o le vaega faaupufai o le Faatuatua i le Atua Samoa ua Tasi, o le a tauva ai se sui faatū mo le vaega faaupufai e puipuia aiātatau a tagata o se tagata faasalalau, o le susuga Tologataua Sooalo Sioeli Alofaifo Lamese.
I le itumalo o Vaisigano 2 lea sa seei ai i le tofi le afioga Valasi Luapitofanua Toogamaga Tafito Selesele, o le a tauva mai ai se isi tamalii ua na lagolago le vaega faaupufai e puipuia aiātatau a tagata, o le afioga Alopopo Siafausa Matafeo.
O lē sa tula’i i le tofi faipule o le itumalo sa manumālō mai i le fu’a a le Faatuatua i le Atua Samoa ua Tasi i le palota tele o le 2021, ae o le a tauva i le fu’a a le vaega faaupufai o le Samoa ua Potopoto.
I le itumalo o Gagaemauga 1 lea sa seei i le tofi le afioga Tuala Tevaga Iosefo Ponifasio, o le a tauva mai ai se isi sui o le pati faaupufai o le Faatuatua i le Atua Samoa ua Tasi o le tofa Vaaaoao Sālū Alofipo, o le failautusi o lea vaega faaupufai sa tauva foi i le palota tele o le tausaga e 2021.
O lē sa seei i le tofi o le a tauva i le vaega faaupufai o le Samoa Ua Potopoto.
Ua iai le talitonuga o le a iai le taimi e faailoa ai sui tauva uma a vaega faaupufai mo le silafia e le atunuu, a o le’i oo i le aso atofaina o le faigāpalota i le masina o Aokuso.
