O le Pelesetene o le taaloga lakapi liki a Samoa ae o se tasi o tagata faigaluega sinia a le malo i le ofisa o le lesitala o ē fananau ma ē maliliu faapea lesitala o faaipoipoga, le tofa Fiu Faaolatane Ponifasio Vasa, o se tasi lea o sui tauva mo tofi faaolioli o le Palemene ua faalauiloa i luga o upega tafa’ilagi lona sauni e finau le nofoa o le itumalo o Palauli 2 lea sa se’ei ai le afioga Leota Laki Lamositele Sio.
O loo faailoa i le faasalalauga a lea sui tauva o loo lagolago i le vaega faaupufai o le Faatuatua i le Atua Samoa ua Tasi, ma ua tula’i mai ai e to’atolu sui faatutū mo le nofoa o lea itumalo faapalota o le a tauva i le fu’a a lea pati faaupufai e aofia ai ma lē sa avea ma Faipule.
O le itumalo faapalota o Palauli 3 ua faailoa foi i auala o fesoota’iga televavave le sauni ai o se tamalii lauiloa i le atunuu i le auaunaga o le tomai faafoma’i le afioga Leituala Dr Ben Talavou Matalavea.
O loo tauva lea tamalii i le fu’a a le vaega faaupufai e puipuia aiā tatau a tagata.
Ua tula’i mai ua to’alua sui faatutū o le a lu’iina le nofoa o le itumalo faapalota o Palauli 3 sa tula’i mai ai le tofa Lagaaia Ti’aituau Tufuga.
