O le malaga mamao atu o tama ma teine tuai o le Kolisi o Avele i Samoa o loo aumau i atunuu i fafo i le faamanatuina o le 100 tausaga talu ona faavae mai le aoga, ua ta’utino ai nisi o susuga i faafeagaiga sa a’otauina i totonu o le Kolisi e faapea e lē mafai ona galo i le loto le Kolisi o Avele i le tele o lona sao i le tulaga i a’oa’oga ma tulafono sa fai ma taiala i fanau aoga.
Ma o le ala foi lea o le malaga mamao i Samoa i le faamoemoe o le Kolisi ona e pele Avele i le loto ma le agaga.
O le susuga i le faafeagaiga ia Fuimaono Pineula ma le susuga i le faafeagaiga ia Faamoana Vili e aumau i Ausetalia ma galulue ai i le galuega a le Atua.
O le afioga ia Fuimaono Pineula sa amata ona aoga i Avele i le tausaga 1988 ae o le susuga i le faafeagaiga ia Faamoana Vili na a’otauina i Avele i le tausaga 1990 ae faaiuina i le tausaga 1995.
I saunoaga a susuga i faafeagaiga i le tāua o le aoga o Avele e lē mafai ona galo, o le nofoaga sa fatufatu mai ai le lototele ma le agaga faatama tane e iloa ona tu manumalo i mea e fai i totonu o aiga aemaise o ekalesia.
Na iai foi lagona i la vaitaimi o le aoga lenei o Avele e ese le faigata, ae ui i le faigata ma le fefe sa iai i le aoga i tulafono ae sa iai lava le naunau o le loto ona o le fia maua o se lumanai manuia ma lelei.
O le aoga sa a’otauina ai le toa o le loto, o ā lava mea faigata e feagai ma le tamaitiiti aoga mai tama tuai ma galuega faatino, e taumafai lava e fai ma le loto, fai ma le onosai fai ma le lototele.
O le tausaga e 1990 ma le 1991 na afaina ai le Kolisi i nei afā e lua, ae ina ua uma afā sa toe faaleleia lava e tamaiti aoga le lotoā atoa ma faleaoga ma o i foi sa a’oa’o mai ai le olaga galue o fanau aoga.
O lesona tāua mai i totonu o le Kolisi o Avele o loo fai ma faata’imuaga i le soifua galulue o susuga i faafeagaiga ia Fuimaono Pineula ma Faamoana Vili i totonu o le ekalesia o le tāua o le ola faaaloalo ma le onosai, ia faalogo foi muli mai ia mua mai.
E tāua le faalogo ma usitai, auā poo le ā le matua o le tamaitiiti aoga ae a fai mai lava le faatonuga a le tama tuai e tatau lava ona usita ma fai.
O ia lesona uma ua tele lona tāua ma le aoga i susuga i faafeagaiga i totonu o le galuega a le Atua ua valaauina ai e tausi ai le lafu mamoe.
