O le po anapo lea na taunuu mai ai i laufanua o Samoa le Tausala o le Kelope poo le Miss Global ia Shane Quintana Tormes mai Filipaina e tusa ai o se valaaulia a le Kamupani telefoni a le Vodafone Samoa a o faasauni ai se tasi o tamaitai Samoa e auai i lenei tauvaga i Vietnam.
O le taeao nei lea na faafeiloai ai i se ‘ava o le feiloaiga le tausala ma lana aumalaga na ia faailoa ai o lona taimi muamua lenei ua malaga mai ai i Samoa e leai foi sona mafaufau e maua lenei avanoa e malaga mai ai.
“Pau le mea na ou iloa ai Samoa o taimi a o o’u aoga sa aoaoina ai a’u i se tasi o mataupu e ta’ua o le Geography ma o se fiafiaga tele mo a’u ua ou asia mai ai Samoa e laualuga lenei faigamalaga ina ia mafai ona faailoa ma faasoa atu foi le tulaga o lenei faalapotopotoga o loo faatinoina lenei tauvaga e unaia ai le sao o tamaitai i soo se atunuu.
“E leai lava se eseesega o le siosiomaga i Filipaina ma Samoa nei e filemu lava ma o se faamanuiaga le ola a’e i se nofoaga e filemu ona tagata ma lona siosiomaga.
“O loo o’u naunau a mae’a lenei asiasiga o le a mafai ona ou vaaia se tamaitai Samoa i le tauvaga lenei i Vietnam i le tausaga nei.
“E iai nisi o tamaitai sa tauva i le tauvaga lenei sa ou fesili ai e ese le tulaga maualuga o tomai ma agavaa aemaise o galuega o loo galulue ai ae aisea o loo iai pea le naunautaiga e fia tauva ai, ae o le tali e lē na o se tauvaga e faaali ai se lalelei o foliga o se tamaitai ae faaaogā le auala lea e unaia ai tamaitai i le lalolagi i lo latou sao o o latou agavaa ma taleni ina ia mafai ona faasoa atu i soo se tasi.”
Mo tapenaga e pei ona faatino e le kamupani telefoni a le Vodafone Samoa o le vaiaso fou o loo fuafua e iloilo ai talosaga a tamaitai ua faaalia lo latou fia tauva e saili ai se sui mo lenei tauvaga e pei ona faailoa mai e le Pule Sili ia Rana Bose.
“E lē o maua le fuainumera atoa o tamaitai ua faaalia lo latou fia auai i lenei faamoemoe a faapea e mae’a ane lenei iloiloga e lē o maua lava se tasi e talafeauga ma vaega uma e ao ona ausia, ona o matou filifili loa lea o se tamaitai e malaga atu i lenei tauvaga.
“O vaega uma e lautogia ai se tamaitai i lenei tauvaga sa tele lava ona fesiligia mai e le mamalu o le atunuu pe aisea e le ave ai Haylanni peitai e lē mafai lea tulaga ona o le tamaitai lea o loo filifilia mo taaloga a le Pasefika i le taaloga o le basketball ma o le taimi foi lea o le tauvaga.
“O le tulaga foi o loo iai nei e pei ona mae’a talanoaina foi ma le faauluulu o le faalapotopotoga o loo nafa ma lenei tauvaga e lē o mafai ona tauva se tamaitai e tauaveina le tagavai o le atunuu ona o tulaga i tulafono ma tapu o lenei tauvaga ae mafai ona faapea o se Tausala mai le Atu Polenisia poo le Oceania.
“Ae o vaega uma na e lē o taofia ai le naunau o le Kamupani lenei i le faamoemoe e auina ai se tamaitai mai Samoa e tauva i lenei tauvaga.”
O se tasi o fuafuaga i le polokalame a le tamaitai tausala o le asia lea o nisi o nofoaga tau turisi aemaise ai o le maua lea o sona avanoa e feiloai ai i le community o tagata Filipino o loo aumau iinei i le atunuu.
O le afiafi nei lea o le a faia ai le faamoemoe e feiloai ai le Tausala ma nisi o sui o le Malo i le faletalimalo o le Tanoa Tusitala.
