E 207 laupepa o le lipoti na tuufaatasia e le Pule o Maliu poo le Coroner.
O loo faailoa ai taunuuga o ana iloiloga i le maliu o le alii ia Shargin Stephens, o lē na fana e leoleo ona o se tasi o matāupu na tula’i mai i le tausaga e 2016.
I le iloiloga a le Pule o Maliu ia Michael Robb, na ia faamatala ai, ua vave tele le leoleo, probationary officer i lana faai’uga na fai na ala ai ona ia fana Stephens.
Ua latalata tele lona oo atu i lē ua maliu, a o uu ai e Stephen se ‘au’upega malosi – o se slasher na ia faaleagaina ai taavale a leoleo.
E talitonu la Michael Robb o se faalavelave sa lē tatau lava ona tupu, o se matāupu na mafai ona ‘alofia ae faatino i se isi tulaga filemu ma le saogalemu.
Ae peita’i atonu o lagona o le fefe ma le mata’u o le malu o le malo na ala ai lava ona ia fana le alii o Shargin Stephens i le M4 rifle.
Ua faamanino mai i lenei lipoti tele le lē to’a o leoleo i lea aso ma fesiligia ai le ta’ita’iga a le auaunaga i le faatinoga o le latou pitolaau.
Ta’ua o le mea mautinoa ia ave le faamuamua i le saogalemu o leoleo, frontline officers, ae tatau foi ona manatua le ave o le faamamafa i le saogalemu o le tagata o loo latou fesaga’i i taimi o matāupu faapea aemaise pe afai o se tulaga ma’ale’ale.
Faaopoopo foi Robb, o lona iloa e le’i avea le maliu o sia tagata ma lesona i mafaufau o alii leoleo na iai i lea taimi, talu ai, a fesili atu ia i latou e tusa ai ma vaega uma na tutupu i le faalavelave, ae faaali mai o latou lagona lē fiafia, ona o le latou manatu e sa’o lava a latou gaioiga na fai.
Ta’ua foi e Robb le lē taliagofie e ia malu o le malo o le taunuuga o lana sa’ili’iliga.
Faamauina i lipoti, o Michael Robb ua to’atolu iai Pule o Maliu ua iloiloina lenei matāupu, ma ua avatu nei i le Independent Police Conduct Authority ma le matāgaluega o leoleo taunuuga o ana iloiloga, mo se latou faai’uga fai.
I le talaaga o lē ua maliu e faapea, o Stephens, e 35 tausaga le matua, o se alii Māori, ma o se tasi e tele ana soligatulafono ae e lē faatupu vevesi.
Faamauina i iloiloga, o lea alii sa tatala i tua i aiaiga, ma sa faia se auala faaneionapo e mata’itū ai Stephens i Rotorua.
Pe a ma le 6 vaiaso o mata’itū e le’i vaaia lava o solia e Stephens aiaiga o lona tatala ai i tua.
Ae peita’i, e foliga mai e le’i lava nei faamaumauga i leoleo, ae na aga’i pea e faatino a latou sa’ili’iliga poo le police bail-check.
Faamatala e ui o loo latou iloa le itu o loo iai si alii ae as faasolo lava a latou asiasiga, ma e ta’ua e faa 70 taimi na o ai leoleo i le fale a Stephens i totonu o le 38 aso a o le’i oo i le aso na maliu ai o ia.
Ta’ua i le lipoti, sa tele ina faalavelave atu leoleo ma tatu’i lona faitotoa i le leva o le po.
Faailoa e le Pule o Maliu, o lea lava na usita’ia e Stephens aiaiga uma o le tatala ai o ia i tua ae peita’i o ia gaioiga na ala ai lava ona faatupu ita ma lē fiafia le alii i leoleo.
Faaopoopo Robb, e peisea’ī na fai ma taaloga a ia leoleo sia tagata.
O le ala lea o le oso tele o le ita o Stephens ma faaleaga ai loa le taavale a leoleo, ma i’u ai lava ina tula’i mai le faalavelave.
Ta’ua e Robb, o lona iloa i leoleo sa auai i lea matāupu, e lē o ni tagata e iai le malamalamaga lelei e faafilemu ai se faafitauli, ma taofia ai le ono tula’i mai o se faafitauli na semanū e lē fano ai le ola o lea alii ae soifua mai pea.
