O le sosaiete a loia i Samoa ua taunuu iai se faaseā faasaga i ni loia talavou se to’alua e mafua i se TikTok na o la faia ma faasalalau i le api o foliga, ma o loo faatūtū ai se faagaulemalie o ia loia i le faamasinoga.
O loia e to’alua na faia le TikTok e galulue i le ofisa o le Loia Sili a le malo, ma ua mae’a ona faia se faasalaga e le Loia Sili e pei ona lipotia na faamālōlō lē tumau le tasi o loia e aunoa ma le maua o se totogi.
Peita’i ina ua fesiligia se loia sinia o loo avea ma Pelesetene o le sosaiete a loia i Samoa le susuga Alex Su’a, na ia faailoa ai ua tuuina atu nei i le Council a le sosaiete o le itutino lea e su’esu’eina le faaseā ma faia se faai’uga.
