A o laumanuia ai ni tapenaga a nisi o sui sa tauva i le faigāpalota ua mae’a, e tuuina atu i le faamasinoga ni finauga e ala i ni tagi e māfua i faatosina ma isi gaioiga ua soli ai aiaiga o le tulafono o faigāpalota, o lea ua faailoa i se lipoti a le nusipepa o le Sunday Samoan le faaulu atu i le Faamasinoga Faaitumalo o se talosaga a se sui sa tauva i le faigā filifiliga a le itumalo palota o Palauli 2, mo le toe faitauina o palota a lea itumalo.
E pei ona silafia i le mae’a o le faitauga aloa’ia e tasi le palota ua manumālō ai le sui tauva tuto’atasi mo le vaega faaupufai o le Faatuatua i le Atua Samoa ua Tasi le tofa Fiu Faaolatane Ponifasio Vasa e 632 ana palota, pito iai le isi sui tauva tuto’atasi mo lea lava vaega faaupufai le afioga Faaolatane Fiu Tuala Iona Pa’ō na ia maua palota e 631.
O loo iai tuua’iga i le fenumia’i o le faitauga o palota sa faia muamua poo pre-polling atoa ai ma nisi tuua’iga o le lē tausisia o aiaiga o le tulafono o faigāpalota i le faatinoga o le faitauga o palota a lea itumalo.
Afai ae talia lea talosaga o le a faatino loa i lea faamasinoga le toe faitauina o palota mo Palauli 2.
O le sui tauva ua filifilia ma faamaonia lona avea ma sui usufono ma le sui ua tuuina atu lea finauga i le faamasinoga sa auai faatasi i faalauiloa a le Faatuatua i le Atua Samoa ua Tasi a o faagasolo faalauiloa o faatosina o anavatau a pati faaupufai.
