Ua iai nei se taumafaiga a le vasega o alii ma tama’ita’i o galulue faatusitala i lo tatou atunuu, e faia se soālaupulega ma faauluuluga o le matāgaluega o leoleo ma le ofisa o le komisi o faigāpalota, i se taumafaiga e tau faamatalatala nisi o noataga o loo utia ai le faatinoga o galuega o le lipotia o le faigāpalota tele a le atunuu i le masina fou o Aokuso.
O se a’oa’oga o loo faagasolo mo tusitala o le a galulue i le faalauiloaina o faamatalaga i le faagasologa o le palota tele, ua lagalagā ai ni manatu i le tāua o le galulue faatasi o leoleo, ma le ofisa o faigāpalota ma auaunaga a nusipepa, televise, leitio ma faasalalauga i auala o fesoota’iga faaonaponei, ina ia vave maua e le atunuu ata ma faamatalaga o le faagasologa o le faigā filifiliga aoao a Samoa.
O nisi o papuipui ua molimauina a o lumana’i le palota, o le tapu ona pu’e ni ata i le vaega tonu o le nofoaga o loo faatino ai le lesitala o sui faatutū.
Ua na o le ‘aufaigaluega a le ofisa o faigāpalota o loo taga ai lea avanoa ma latou faasalalau foi ia latou fesoota’iga i le api o foliga.
E le’i avanoa atu le Komesina o faigāpalota mo lana folasaga i le a’oa’oga a tusitala ona o loo pisi i le lesitalaina o sui faatutū, ae ua faailoa e se sui o le faalapotopotoga a tusitala i Samoa, o le vaiaso fou ua fuafua e faato’ā maua ai se avanoa o le Komesina e feiloa’i ai ma tusitala ma le ‘aufaasalalau.
