O le uluai saunoaga faataupou a le tamaitai Palemia o le Mālō le afioga Fiame Naomi Mataafa i le tauaofiaaga lona 76 a taitai o mālō aufaatasi na ia faailoa ai le mulimulitaia e Samoa o ala o le Tulafono lea ua mautu ai le faigamalo ua filifilia e tagata o le atunuu ma avea ai o ia ma uluai Palemia tamaitai o le malō tutoatasi o Samoa. 

O le Aso Sa na saunoa ai le Palemia i le fono o malo aufaatasi e faaaoga ai fesootaiga tekonolosi na tuu sa’o atu i Samoa.

O le loka o tuaoi o faigamalaga faavaomalo masani ona o puipuiga o le faama’i o le Koviti 19 ua lē mafai ai ona auai atu le tamaitai Palemia faapea nisi o taitai o le Pasefika i lea tauaofiaga a malo aufaatasi e pei ona sa masani ai i taimi lenei e usuia ai lea faatasiga a taitai o Mālō o loo avea ma sui o malo aufaatasi i le nofoaga tutotonu i le aai o Niu Ioka (New York) i Amerika. 

I le saunoaga a Fiame na ia ave ai le tuualalo i taitai o Mālō uma ina ia tutū faatasi e faia galuega mo le puipuia o atunuu laiti mai aafiaga tetele o le tau aemaise o le galulue faatasi e ofoina le fesoasoani mo tagata o le atunuu o Afghanistan ua sulufai i le fia maua o se saolotoga e mafua i pulega sauā a taitai o lea Mālō. 

O aafiaga o le atunuu o Haiti i se mafuie tele talu ai nei ua faailoa e le afioga Fiame i luga o Mālō aufaatasi e lagolagoina e Samoa taumafaiga uma mo le puipuia o lea atunuu o se sui o le faalapotopotoga o malo laiti o le lalolagi ua lamatia i suiga o le tau.

O le tuualalo foi lea a le tamaitai Palemia i atunuu uma aemaise lava Mālō mauoloa ma malolosi tamaoaiga e logosaia feagaiga faavaomalo e faaititia ai kasa oona mai fale gaosi oloa, o loo puaina atu i fafo ma afaina ai le afuafu o le lalolagi (ozone layer) lea e fesootai i suiga tetele o le tau ua mafua ai mala faalenatura ua afaina tele ai le saogalemu o atunuu laiti ona o le siitia o le sami .

Ua faailoa e le tamaitai Palemia i le Mālō aufaatasi le faataua o le tū tumau o Samoa i le amanaia ma le puipuia o aiā tatau o tagata le usitaia o ala faletulafono o le faataua o manu lauti o aoaoga ma talitonuga faakerisiano atoa ai ma le faataua o ana tū ma aganuu.