Ua amata i le vaiaso nei galuega a le faamasinoga o talosaga toe iloilo a le Faamasinoga Maualuga a Samoa, o le a toe tagofia ai nisi o faai’uga o matāupu ua uma ona faia iai faai’uga a le Faamasinoga Sili.

Ua aofia ai i ia matāupu ma le tagi a leoleo faasaga ia Talalelei Pauga o se matāupu e le’i iloiloina molimau o le tagi autū, lea o loo molia ai e leoleo Talalelei i le solitulafono o le taupulepule e faaoo le maliu i lē sa avea ma Palemia o le atunuu.

O le Aso Gafua o lenei vaiaso a o le’i amatalia galuega a le faamasinoga o talosaga le Court of Appeal sa faafeiloa’i muamua alii faamasino mai Niu Sila i le ‘ava o le feiloa’iga sa auai le afioga i le Faamasino Sili ma nisi o faamasino o le Faamasinoga Maualuga ma le Faamasinoga Faaitumalo.

E lua vaiaso o le a faagasolo ai galuega a lea faamasinoga.