E $786,258 tala le tinoitupe ua tauaao e le malo o Samoa o se faamanuiaga ua totogi mai e le auaunaga i le Pasefika e ta’ua o le Pacific Catastrophe Risk Insurance Company, e māfua ona o aafiaga mai le galulolo poo le sunami sa mafua i le mafui’e e 8 tesimale 8 lona malosi i le masini fua mafui’e sa lūlūina ai se vaega o le atunuu o Rusia i le lua vaiaso ua mavae.
E tusa ma le tasi le mita le maualuga o galu sa aafia ai Samoa mai le galulolo talu lea mafui’e malosi i le aso 30 o Iulai.
O le tupe ua totogi mai e lea kamupani ua faaalia i se pepa o faamatalaga o le a mafai ona totogi ai ni mea sa faaleagaina ona o aafiaga o le galulolo sa lapata’ia ai Samoa ma nisi o atunuu o le Pasefika faapea nisi o atunuu o le lalolagi.
O le Minisita o Tupe o le malo tausi le afioga Lautimuia Afoa Uelese Vaai sa ia taliaina lea seleni tele mai se sui o le kamupani inisiua.
