O folafolaga a patī faaupufai ua faailoa nei i le atunuu ma le mau miliona ma miliona o le a faatino ai ia fuafuaga pe afai o ai lava le patī e manumālō mai.
Na tāpā ai se finagalo o le tama’ita’i Palemia o le malo tausi e tusa o folafolaga ua faailoa lautele ma se silasila mamao i le faatupeina o ia fuafuaga, aemaise o le tulaga o le faaauau.
Na māfua le fesili i le afioga Fiame Naomi Mataafa, ona o le palota tele a le atunuu o loo loma nei, o tapenaga o anavatau a patī faaupufai ua manino e lē o alo tamala lava i tapenaga, e lē gata o fuafuaga e siitia ai le atina’e o le tamaoaiga, ae o fesoasoani o loo autū i le faaitiitia o le tau o le soifuaga ma le ola mativa o o tatou tagata e limavaivai ma maualalo le tamaoaiga i le itu tau tupe maua.
Le afioga Fiame Naomi Mataafa o le ta’ita’i o le vaega faaupufai o le Samoa ua Potopoto o le Palemia o le malo tausi.
