O le faatūina ai o le auaunaga fou a le Malo e tapenaina oloa eseese mai Samoa mo le faatauina atu i maketi i fafo, aemaise lava i oloa tau faato’aga, ua aga’i ai le Matāgaluega o Faato’aga ma Faigafaiva e a’oa’oina lelei tagata o auaunaga eseese o loo aveina oloa i fafo poo exporters.
O le tasi o vaega tāua o lea tapenaga o le aga’i atu o le matāgaluega e fausia se fale fou i Atele le nofoaga o loo tapena ai oloa tau faato’aga e pei o le talo.
Ua faailoa e le matāgaluega ua tele lu’itau ma suiga i lenei vaitau e pei o suiga ma’ale’ale o le tau ua aafia ai faato’aga, ma ua faatupula’ia ai ma faama’i eseese ma iniseti faalafuā ua mafua ai ona siisii ai i luga ma aiaiga tau fefaataua’iga o oloa i le va o atunuu.
O le polokalame tau a’oa’oga sa autū i le a’oa’oina o tagata i auaunaga e ave ai oloa i fafo na faailoa ai e le Minisita o le Matāgaluega o Faatoaga ma Faigafaiva, o le aga’i atu e faatino le faatūina o le fale e tapena ai oloa fou poo se packhouse i Atele, o le faamoemoe ia lelei ma saogalemu oloa e ave i fafo aemaise ia mulimulita’ia aiaiga o fefaataua’iga faavaomalo.
