I le amatalia ai o le savaliga a le faigāmalo fou na filifilia e Samoa mai lana faigāpalota tele ua mae’a atu nei, o le ivitu malosi o ana fuafuaga faatino o le aufaigaluega a le malo.
E lē toe tau faailoaina i le atunuu tulaga na feagai ma le ulua’i faigāmalo a le vaega faaupufai o le Faatuatua i le Atua Samoa ua Tasi i le mae’a o le palota tele o le tausaga e 2021, i lu’itau sa feagai ma le Palemia ma le Kapeneta i lena taimi i le va feagai ai ma le aufaigaluega a le malo, e māfua ina ua faato’ā suia se pulegamalo i le tuana’i o le 40 tausaga o tumalo le vaega faaupufai e puipuia aiā tatau a tagata.
I le feiloa’iga a le Palemia, susuga Laaulialemalietoa Leuatea Polataivao Fosi Schmidt o lana Kapeneta ma Minisita Lagolago ma Faauluuluga o auaunaga eseese a le malo aemaise o tagata faigaluega sinia, sa tuusa’o ai fautuaga a le Ta’ita’i o le malo i le naunauta’iga ia sao ma uli le faatautaiga o galuega i le lima tausaga ua amata savali o le isi faigāmalo fou a le Faatuatua i le Atua Samoa ua Tasi.
Le afioga i le Palemia, susuga Laaulialemalietoa Leuatea Polataivao Fosi Schmidt i se vaega o lana saunoaga i le feiloa’iga ma faauluuluga o matāgaluega ma faalapotopotoga a le malo i le Aso Tofi o lenei vaiaso.
O se feiloa’iga sa auai ma Minisita o le Kapeneta faapea Minisita Lagolago.
