Ua aumai faalaua’itele se finagalo o le Sosaiete a Loia i Samoa ua talosagaina ai le tausisia o le malupuipuia o aiaiga o faigāpalota mo le sologa lelei o faigā filifiliga amiotonu.
O le faigāmalo faatemokarasi a Samoa o loo mausalī ai le aiā ma le agavaa tutusa o tagatānuu uma o Samoa e filifili o latou ta’ita’i poo sui filifilia i totonu o le faigāmalo.
Ae i le tausaga 1990 e pei ona faailoa e le sosaiete, sa faatino ai se pelepesite a le atunuu, ma sa faailoa manino ai e tagatānuu o Samoa le latou lagolagoina faalaua’itele o aiā tatau o faigāpalota.
O le faavae lea na suia ai le tulafono, ina ia amana’ia le aiā tatau a le tagatānuu Samoa ua atoa le 21 tausaga, e faatino ai lana palota.
“O le aiā tatau o faigāpalota lautele o le maatulimanu poo le malosi’aga lea o loo faavae ai faigāmalo faatemokarasi ma o loo mulimulita’i ai le filifiliga o le Palemene.
O filifiliga tonu ma le sa’oloto e taula’i ma fesoota’i – i aiā tatau faavae e pei o le aiā tatau e faasoa ai manatu ma le aiā tatau e auai ai i le filifiliga o faigāmalo e pei ona faamausalīina i lalo o le Faavae o le Malo o Samoa mo tagatānuu uma o Samoa.
E aofia ai foi le sa’olotoga o le tautala, faapotopotoga, faalapotopotoga ma le fegasoloa’i.
O nei vaega tāua o loo faavae ai faiga faatemokarasi a Samoa, e pei ona faailoa e le Peresitene o le Sosaiete a Loia le tama’ita’i o Fiona Ey.
“O faiga faatemokarasi malosi ma mausalī e ao ona faailoa manino, amana’ia ma faaaloalogia le fefaasoa’iina o manatu.
O faigā filifiliga tonu e tatau ona amana’ia ai le sa’olotoga mo tusitala e faatino ai le latou pitolaau, e aunoa ma le faamata’u e taofia ai tagata/sui i le tali atu.
E lagolagoina e le Sosaiete a Loia le valaau/taualaga a le ofisa o le Komesina o Sulufa’iga poo le Faalapotopotoga o Aiā Tatau a Samoa (National Human Rights Institution) ina ia faatagaina le sa’olotoga o le tagatānuu Samoa e faatino lana aiā tatau faalemalo,” e pei ona ta’ua e Ann Matalasi Fata, o le Sui Peresitene o le Sosaiete a Loia.
O le Pule a le Tulafono e faavae i le amiotonu ma le to’afilemu o alalafaga e tusa lea ma se faigāmalo e limata’ita’iina i pulega lelei, ma tulafono amiotonu.
E tatalo atu ai le Sosaiete a Loia mo tagatānuu uma ina ia amana’ia ma faaaloalogia le sa’olotoga o filifiliga o faigāmalo ma le aiā tatau e auai ai i taualumaga uma o le faigāpalota mo le malupuipuia o faiga faatemokarasi.
O le Sosaiete o Loia Samoa o le faalapotopotoga lea o loia uma o Samoa.
O se tasi o ana matafaioi o le faufautua mo le pule a le tulafono ma le tausisia o le Faavae ma tulafono o Samoa.
