O le 190 o suafa o nisi o matai o nuu ma itumalo ua faaulu atu e avea ma sui tauva o le palota tele, ua faailoa e le Komesina o faigāpalota o loo matala pea le faitoto’a i le avanoa e toe faaui ai i tua ni suafa o ni sui faatutū.

O le ta o le 12 i le aoauli o le Aso Tofi o le vaiaso a sau le aso 14 o Aokuso e faamuta ai lea avanoa.

Talu mai le tapunia o le piliota sa faaulu ai suafa o sui faatutū e to’atasi le sui tauva ua faaui i tua le suafa mai le itumalo palota o Faasaleleaga 5.

O faamasinoga o loo faagasolo nei i lu’i faasaga i agavaa o nisi o sui tauva, e iloa ai i ni faai’uga e fofogaina i le Aso Faraile a sau pe tumau pe aveesea ni suafa o sui faatutū o loo molia i ia matāupu tau faamasinoga e faasino i agavaa o sui tauva ma faai’uga a le Komesina o faigāpalota.