Ua tatala i tua le afioga Faumuina Sikuka Lomitusi o se tamalii sa malaga mai atunuu mamao o loo aumau ai, ae taofia e leoleo i se tusi saisai ona o ona moliaga o le umia o nakoti poo fualaau faasāina sa molia ai i le tausaga e 2019.
Na faatonuina se tusi saisai mai lea taimi ona ua lē oo atu i le faamasinoga Faumuina e tali i ona moliaga.
O le Aso Gafua o lenei vaiaso na toe tula’i ai o ia ma tatala ai e le faamasinoga mai le vaaiga a leoleo sa taofia ai i le falepuipui i Tanumalala, ina ua leai se tetee a leoleo i le tatala ai i tua.
O le tasi lea o aiaiga o lona nofo ai i Papa Puleia i Savaii ma faatali Aperila o le tausaga fou e faia ai lona faamasinoga, o le tapu pe faasā ona ia tuua Samoa.
Ua faatonuina ona pepa malaga ma lona tusifolau e taofia e le faamasinoga, ma ia saini faalua i le vaiaso i le ofisa o leoleo i Vaitoomuli i Savaii.
O loo iai nisi moliaga o lea tamalii i le Faamasinoga Faaitumalo ma o ia moliaga e mafua i ni tagi o loo tuua’ia ai i le faia o ni faasalalauga taufaaleaga ma le taufaamata’u i luga o upega tafa’ilagi.
Ua silia i le masina o taofia Faumauina Sikuka Lomitusi i le vaaiga a leoleo talu ona taunuu i Samoa i le tau amataga o le masina o Iulai.
