O fuafuaga a le malo mo le siitia o le auaunaga a foma’i ma tausi soifua i falema’i faaitumalo mo le vaaia o le soifua lelei o le atunuu, o se tasi o fuafuaga ua tino mai, o le fausia o maota e faamautū iai foma’i o loo galulue i falema’i faaitumalo.
E lē gata i lea galuega ae o le toe fausia o vaega faaopoopo o nisi o falema’i faaitumalo i lo tatou motu o Savaii.
Photos: Ministry of Health Samoa
O le faai’uga o le vaiaso ua mavae na umusa ma tatala ai e le Palemia o le malo tausi faatasi ai ma le minisita o le soifua mālōlōina le faaopoopoga poo le extension o le falema’i faaitumalo i Sataua faapea ai ma Satupaitea. Na tatala ai foi ma maota e faamautū iai foma’i o galulue mo ia falema’i faaitumalo.
O le matāgaluega o galuega tetele a le malo ma le matāgaluega o le soifua mālōlōina sa mata’itūina le faagasologa o ia galuega sa fausia e le konekarate faufale o le Zheng Construction.
