O le atina’eina o faatoaga i lo tatou atunuu e sologa lelei ni fuafuaga pe a lelei tagata ma meafaigaluega e faaaoga iai, faaopoopo foi ma le lelei ona pulea le faafoeina o se taumafaiga i le toe gagauina o le vao.
O le tāua o ia vaega uma i le silasila mamao a le Malo, ua faia ai e le Kapeneta se faaiuga ua toe fetuunai ai, aiaiga o le aumai i le atunuu o taavale pikiapu e fesoasoani i le atina’eina o faatoaga ma isi auaunaga tāua e manaomia ai ia ituaiga o taavale.
Ua tatala ai nei le avanoa e toe faaulufale mai ai pikiapu e aai uma pa’u e fā poo fourwheel drives ua tai 20 tausaga talu ona faaaogā.
E mafai ai foi ona aumai ma pikiapu ituaiga mamā i lalo o lea toe fetuuna’iga.
Ua faailoa e le taitai o le Malo le afioga i le tamaitai Palemia, o le a tumau pea le aiaiga o le 10 tausaga mo isi ituaiga o taavale e aumaia i Samoa, lona uiga ua na o pikiapu ua tai 20 tausaga talu ona faaaoga e aumai, ae e aumai i le tulaga o loo lelei atoatoa.
