Ua tatala aloa’ia nei i faletusi a Laulauafono a Aukilani – Auckland Council Libraries se faaaliga o measina ma galuega a tagatānuu mai le Pasefika ua faaigoaina o le Lupe i Vao Ese.
Na amata faufau ma tuufaatasia lenei faaaliga tele i le 2 tausaga talu ai, ma o loo faaalia ai galuega ma taleni o tagata Pasefika aemaise o le maua ai o avanoa e faamausalī ai taumafaiga ma taleni a tagata Pasefika; aemaise o le saga faapupula ai le tāua tele o measina a o tatou tagatānuu.
O le tele o vaega na tatala mo le to’atele e maimoa ai, e aofia ai le tele o measina mai aso anamuā, o ni measina a aiga, o le ie Samoa (fine mats) o le ie Fiti ua ta’ua o le masi ma nisi o ie mai le Atu Kuki.
Faaalia e le tasi o sui na tuufaatasia ana galuega mo lea faaaliga ia Pamata Toleafoa – o le ‘auga ma le faamoemoe lava ia mo lea faaaliga tāua o le maua ai e tagata Pasefika o le mafanafana, a o latou molimau ma maimoaina nei measina ma galuega.
Na ta’ua e le ta’ita’i o auaunaga mo faletusi a le laulauafono a Aukilani, Catherine Leonard, o se matāti’a lenei e faamoemoe i le ave ai o le faamamafa i vaega tāua o tu ma aga i fanua o tagatānuu Pasefika, ma o le a faapena ona faatino talanoaga ma nisi o faatinoga auā le saga faamausalī ai o lenei vaega tāua i aganuu a le Pasefika; a ia maua foi le avanoa e malamalama ai le isi tagata i le isi tagata.
O lenei faaaliga o le a tatala se’ia pau mai le masina o Mati o le tausaga e 2026.
Puna o Faamatalaga: https://www.rnz.co.nz/international/pacific-news/573838/auckland-libraries-unveils-lupe-i-vao-ese
