Ua tatala aloa’ia nei le nofoaga mo a’oga faaleoleo i Aukilani i lenei vaiaso. 

I se pepa o faamatalaga na faailo ai e le Komesina o le Matāgaluega o Leoleo, Richard Chambers o lenei nofoaga na mafai ona lisiina mai i le Iunivesite o Massey. 

Ma i le maua ai o lenei nofoaga fou o le a mafai ai e le Matāgaluega ona faatino le tele o polokalame faalea’oa’oga i vaega o le auaunaga aemaise lava i latou ua ulufale atu mo le ulua’i taimi e amata tapenaga ma a’oa’oga i le avea ai ma malu o le malo. 

Faailoa e le Komesina le tāua o le maua ai o avanoa, e faaauau ai ona faatino polokalame faalea’oa’oga mo ē ua fia avea ma malu o le malo, ma polokalame mo sinia. 

Ta’ua e Chambers, i nai tausaga ua mavae, na vaaia le tele o polokalame faalea’oa’oga mo sinia e faia i fesoota’iga tele vavave poo luga o le intaneti ina ia maua se avanoa mo le tele o sui e faatino ai a latu polokalame. 

O isi polokalame e lē o mafai ona faatino i luga o le intaneti ae o le tulaga tonu lava lena sa sa’ili ai se vaega e maua ai le avanoa e omai faatasi uma ai e faatino a latou a’oa’oga i se nofoaga e tasi.

Na faamanino foi e le alii Komesina le telē o le galuega na aga’i i le taumafai mai o lenei faamoemoe talu ona sainia le lisi ma le Iunivesite, ma o lea ua tau lau o le faamoemoe.

Ua lipotia mai nei le amatalia ai o le ulua’i polokalame faalea’oa’oga i le Auckland Campus ua ta’ua o le Leadership and Development group conference.

I tulaga o lenei nofoaga, o loo iai potu e faatino ai vasega eseese, o potu e sui ai poo locker room, o ofisa ma le nofoaga e paka ai taavale ma isi. 

E 40 sui fou poo recruits o le a faaaogāina lenei nofoaga fou mo a latou a’oa’oga i le avea ai ma malu o le malo

Na ua’i atu ai le Minisita o le Matāgaluega ia Mark Mitchell faapea ai le Minisita Lagolago ia Casey Costello i le tatala aloa’ia ai o le Royal New Zealand Police College (RNZPC) Auckland Campus.

Puna o Faamatalaga: https://www.police.govt.nz/news/release/police-college-opened-auckland