O le Aso Gafua o le vaiaso nei na amata tatala ai mo le 24 itula le vaega o gasegase tausāvali i le maota gasegase o Tupua Tamasese Meaole i Motootua, e māfua ona o le tulaga pepesi o le vairusi o le fiva o ponaivi.
O gasegase tausāvali masani e fia vaai se foma’i ua faatulaga e mai le 8 i le taeao e oo i le 6 i le afiafi e maua ai lo latou avanoa, ae o le 6 i le afiafi e oo i le 8 o le taeao o le aso e sosoo ai, o taimi ia mo gasegase e fesoota’i i ni āuga o le fiva o ponaivi.
Ua faaalia e le Sui Faatonu Sili o le soifua mālōlōina le afioga Tagaloa Dr Robert Thompson talu mai le vaiaso na te’a nei sa faamauina ai le aofa’iga e 911 o gasegase ua masalomia i āuga o le fiva o ponaivi, o le amataga o le vaiaso nei na maua ai le faai’uga o su’esu’ega ma faamaonia ai e 498 gasegase mai lea aofa’iga ua faamaonia o āuga o le dengue fever.
Peita’i i le falema’i o tamaiti i le maota gasegase i Motootua, e 27 fanau o loo taofia ai ae e leai se gasegase o tigāina ona e lē o toe iai se isi o taofia i potu mo gasegase tigāina le ICU.
O le feiloa’iga a tusitala ma le komiti o faalavelave faafuase’i le National Emergency Operation Center Committee na faailoa ai ia fuainumera lata mai o tagata ua aafia i le fiva ponaivi e le Sui Faatonu Sili o le Matāgaluega o le Soifua Mālōlōina.
Le Sui Faatonu Sili o le soifua mālōlōina le alii foma’i le afioga Tagaloa Dr Robert Thompson.
