I le feiloaiga faapitoa a le tamaitai Palemia ma le vasega o Tusitala na ia faailoa ai fuafuaga ua autasi iai le Kapeneta mo le saogalemu o Samoa ma o le a tapunia ai le atunuu atoa poo le lockdown amata atu le itula e 6 i le afiafi nei 22 o Ianuari 2022 seia ta le itula e 6 i le afiafi o le Aso Gafua 24 o Ianuari.
O lea faasilasilaga na taua ai foi e le afioga Fiame Naomi Mataafa le siitia ai o puipuiga poo alert level i le atunuu i le vaega tolu poo le lanu mumu.
Faailoa foi e Fiame ua na’o le aufaigaluega ua faatagaina o le a faaauau pea lo latou tiute mo le tuuina atu o le auaunaga moomia mo le soifua poo auaunaga essential services ae le gata i lea o le tali atu i ni faalavelave faafuasei e moomia e le atunuu.
O le a leai ni taavale feoai i luga o auala tele vave ae ua na’o taavale ua faatagaina mo le faatinoina o auaunaga mo le puipuiga o le atunuu. O lona uiga o le a taofia uma galuega seia vagana ai auaunaga moomia, tapunia foi aoga faapea soo se femalagaiga, o faleoloa faapea foi tapuaiga.
Ua faamanino mai foi e le Palemia le faamalosia o le talimau o tagata i o latou aiga e aunoa ma le feoai solo.
I le feiloaiga ma le NEOC i le vaiaso nei na taua ai e le Ofisa Sili o le Soifua Maloloina Leausa Dr Take Naseri o samples mai suesuega ai latou ua aafia o le a ave i Niu Sila mo suesuega ina ia faamautinoa ai le ituaiga vairasi koviti (Delta poo le Omicron) ua aafia ai i latou nei.
Ua faailoa foi e le Samoa Shipping Corporation le SSC o le malaga mulimuli a vaa i le va o Upolu Salafai o le itula e 4:00 i le afiafi nei.
