E lata lava i le 20,000 faia’oga o kolisi i Aotearoa nei, ua savavali e faailo lo latou tetee tele i le malo ma lo latou ‘ofa ua tuuina mai i siitaga o a latou totogi.
E lē o talia e faia’oga o a’oga maualuluga le na o le 1% o le siitaga i le tausaga mo le isi 3 tausaga e pei ona faailo mai i felafolafoa’iga i totogi.
Ua upuia e le Asosi a Faia’oga, le Primary Teachers’ Association (PPTA), ua o latou faapea, ua mata’utia tele le lē vaai alofa i nai faia’oga, ma e faamauina o se siitaga aupito i maualalo lenei augatupulaga.
Ta’ua e le Peresitene o le asosi, PPTA, Chris Abercrombie, o le 18,000 –19,000 o faia’oga ua aga’i e solotete’e ona o lea 1% ua fuafuaina nei mo siitaga, o le a atili ai ona leai ni faia’oga e toe foi mai e galulue ae as’ili i isi galuega.
O le a lē amana’ia ai o le tele o vaega e tatau ona faatino mo a’oa’oga a fanau, aemaise lava tulaga o Taiala o A’oa’oga poo le Curriculum, ma le tulaga o loo iai le suiga ua oo mai i su’ega a fanau le NCEA.
Faamatala e le Minisita Lagolago, David Seymour ua vavevave tele faia’oga e faatino nei solotetee.
Ae ua faaalia e Judith Collins ua na o ni gaioiga faapolokiki lava nei solotetee.
O loo tāmau pea le malo ma le latou faai’uga, ma faamauina ua oo le 14% siitaga o totogi i tausaga ua uma atu. Ma le 60% o faia’oga ua maua le $100,000.
Ua lapata’ia e le PPTA le malo afai ae leai se isi fetuuna’iga o lona uiga o le a vaaia le leai o ni vasega a fanau e amata atu i le aso 15 o Setema.
Puna o Faamatalaga: https://www.nzherald.co.nz/nz/teachers-strike-nearly-20000-protest-over-1-pay-rise-offer/Z4XQD2QNNVEYPBVDKUZEYVZQZ4/?lid=yja1qloeace9#google_vignette
