E le o se faafitauli fou le mea lea o le iai o isumu i le faleoloa o le Countdown i Dunedin, ae sa ta’ua e le Woolworths i lena taimi o lea ua mae’a togafitia lena faafitauli.
Peitai o lea na toe aumai i le tusitusiga a le NZ Herald i le aso ananafi, talu ai nei na toe ta’ua ai e le faatonu o faleoloa a le Woolworths, Jason Stockill, o lea ua manino mai e lei foia atoatoa le faafitauli.
Ta’ua e le faatonu, sa taumafai lava e faatino auala uma i masina ua tuanai ina ia matuā ave le faamuamua i le siitia o le tulaga tumamā ma le saogalemu o meaai i totonu o le faleoloa, ae o le tulaga faanoanoa, o lea ua iai faamaoniga na toe vaaia foi i nai aso talu ai nei ni isumu, lona uiga o loo tele pea galuega e tatau ona faatino.
O lea na ta’ua e le deputy director-general o le New Zealand Food Safety, Vincent Arbuckle, o le a tapunia le faleoloa mo le 48 itula ae se’i matuā toe fufulu uma ma faatino uma isi vaega e kili ai nei meaola faalafuā.
