Ua lē logo lelei i le ta’ita’i ma le vaega faaupufai o le Samoa ua Potopoto se finagalo ua tasi iai le paia o le Nofo a Faaaloaloga o le Falefitu a le Aiga Taua’ana ua teena ai le faia i eleele o Falelatai, amata mai Si’ufaga e oo i Matautu o ni faatasiga faalauiloa a soo se vaega faaupufai e aofia ai ma le latou patī, ae ua na o le vaega e puipuia aiā tatau a tagata e faataga.
Ua tapu ma faasā ai foi ma laupapa faailoilo e faalauiloa ai le sui tauva a le Samoa ua Potopoto mo le tofi faaolioli o le nofoa o Falelatai ma Samatau, lea o le a tauva ai se tasi o tamalii mai lea itumalo faapalota o le atunuu le afioga Faalavaau Fasitau Ula.
Ua faailoa i le tusi ua ave i le ta’ita’i o lea patī faaupufai o loo saini ai matai o le Nofo a Faaaloaloga a le aiga Taua’ana, ua na o le vaega faaupufai e puipuia aiā tatau a tagata e taga a latou faalauiloa ae lē talia isi vaega faaupufai.
Ua tāpā ai nei e le ta’ita’i o le Samoa ua Potopoto le afioga Fiame Naomi Mataafa e ala i se tusi, se finagalo o le Komesina o faigāpalota le afioga Toleafoa Tuiafelolo Alexander John Stanley.
O le tāpā e le Sa’o Faapito o se finagalo o le Komesina o faigāpalota ona ua ia faailoa i lana tusi e telē se aafiaga faaletulafono o aiā tatau o tagata tauva, o tagata palota ma vaega faaupufai i ni faai’uga faapea a alii ma faipule.
O le faai’uga e ala i se finagalo o le Nofo a Faaaloaloga o le Falefitu o le Aiga Taua’ana e māfua i le tasi ua toe filifilia ai le tamalii sa seei i le nofoa o le tofi faipule o le itumalo i le paeaiga 17 le afioga Lupematasila Lavea Tologatā Tile e avea ma sui tauva i le faigā filifiliga aoao a le atunuu o loo loma nei.
O le sui faaolioli o le a tauva i le fu’a a le Samoa ua Potopoto mo le nofoa o Falelatai ma Samatau ua faaalia i le tusi ua na soli le Afioga Tutasi ona e le’i silafia e ta’ita’i o le aiga Taua’ana.
Ua faailoa e le afioga Fiame Naomi Mataafa le ta’ita’i o le Samoa ua Potopoto i lana tusi i le Komesina o faigāpalota, e ono mafai ona faatula’i i totonu o lotoifale o nuu ma afio’aga ni faai’uga faapea, ae a sosolo atu loa i se tulaga ua faalaua’itele i le atunuu atoa o se laasaga lea e lamatia ai le faavae o le pule faaletulafono o loo fau ai le Malo Tutoatasi o Samoa.
O le tusi a le ta’ita’i o le vaega faaupufai o le Samoa ua Potopoto i le Komesina o faigāpalota o loo tuuina atu ai kopi i ta’ita’i uma o isi vaega faaupufai e aofia ai ma le vaega e puipuia aiā tatau a tagata.
