O le Signature Choir Mana Moana o le aufaipese a le komuniti i totonu o Ueligitone, ma sa faavae mai i le tausaga 2018 ma o lea ua savali nei i le 5 tausaga talu ona amata mai.
O le aufaipese o loo taitaia e le afioga ia Fepuleai Helen Tupai ma o se alo o le atunuu ua leva ona aotauina i tulaga o musika ma aufaipese, faatasi ai ma nisi o alo o le atunuu sa aotauina foi i le musika ma sa auai i nisi o aufaipese eseese ae o lea ua toe galulue faatasi ma tuufaatasia le Signature Choir Mana Moana.
E 50 sui o loo auai mai ekalesia eseese ma o tagata e fiafia e faaaogā le latou taleni o le pese.
O le tele o sui auai o alo ma tamafanau mai Samoa ae itiiiti lava sui mai Niue ma Fiti, ma o se aufaipese foi o loo ta’ua ai le Pasifika.
O le 17 tausaga le tamaititi laititi o loo iai i le aufaipese faasolo atu i luga i le 60 tausaga le matutua.
O pese o loo lagiiina e le aufaipese o le Signature Choir Mana Moana o pese masani Samoa o loo iai o latou pine faamau, ma o pesega foi sa fatuina e alo ma tamafanau a le tatou atunuu.
O le aso 24 o Novema o lea ua fuafua le Signature Choir Mana Moana e malaga mai ai i Aukulani e faataunuuina le latou konoseti i le Spark Arena.
Ma ua ta’ua e le afioga ia Fepuleai Helen Tupai, e 30 nisi o sui mai Aukilani o lea ua faaopoopo i le aufaipese auā le faamoemoe o loo loma nei ia Novema.
Ma o se fiafiaga sili lea mo ia ona ua mafai ona galulue faatasi ma nisi o alo o le atunuu o loo i Aukilani.
