Ua faamautū mai e le sui Faipule o Lotofaga le tapena o se vaega faaupufai fou o le a faalauiloa i le faata’ape aloa’ia o le Palemene i le Aso Lua a sau, i le fuafuaga o le pati lea o le tauva ai i le palota tele faatasi ai ma isi sui faipule e to’asefulufā o loo aofia i le li’o o minisita o le pulega faatonu.
O sui faipule o loo i le Kapeneta se’ia vaganā le faipule o Aleipata Itupa i Lalo ua faaseetuāgalu mai le Kapeneta, le tofa Mauu Siaosi Puepuemai mai le Vaa o Fonoti, le afioga Lautimuia Afoa Uelese Vaai mai Vaimauga 3, le tofa Leatinuu Wayne Sooialo mai Faleata 2, le afioga Faualo Harry Jeffrey Schuster mai Vaimauga Nu.4, le afioga Laumatiamanu Ringo Purcell mai Safata Nu.2, le afioga Toeolesulusulu Cedric Schuster mai Aana Alofi Nu.4, le afioga Tuala Tevaga Iosefo Ponifasio mai Gagaemauga Nu.1, le afioga Niuava Eti Malolo mai Vaisigano Nu.1, le tofa Olo Fiti Afoa Vaai mai Salega Nu.2, le tofa Lagaaia Ti’aituau Tufuga mai Palauli Nu.3, le tofa Matamua Vasati Pulufana mai Faasaleleaga Nu.1, le afioga Toogamaga Valasi Tafito Selesele mai Vaisigano Nu.2, le afioga Seuula Ioane mai Alataua i Sisifo, ma le afioga Faleomavaega Titimaea Tafua mai Aleipata Itupa i Lalo ua faamavae ma le tofi minisita ona o moliaga tau taavale afi.
E faato’ā faalauiloa le vaega faaupufai fou e tauva ai i latou ia ma faailoa ai ma le igoa o le latou pati.
Le sui faipule o le itumalo faapalota o Lotofaga le afioga i le Sa’o fa’apito afioga Fiame Naomi Mataafa.
