Ua faalauiloa mai nei i se pepa o faamatalaga mai le MIss Samoa NZ suafa o tamaitai e to’alua o le a faia i ai le filifiliga mulimuli a le laulau o faamasino, mo se tamaitai e tauaveina le pale o le Miss Samoa NZ mo lenei tausaga e 2022. 
O tamaitai o Shilohm Vaeluaga Filipi, e 22 tausaga o lona matua, ma o ona tupuaga e mai alalafaga o Siumi, Matautu i Lefaga, Saanapu, Saleaumua, ma Vaovai i Falealili. 

O le isi tamaitai o Georavi Apulu, ua 23 tausaga o lona matua, ma o loo faamauina o Faleasiu ma Apia alalafaga o ona tupuaga. 

Ta’ua i le pepa o faamatalaga, e to’aono tamaitai lalelei sa faaulu mai o latou suafa e fia tauva, ma e pei ona silafia, o vaega amata o lenei tauvaga ua faagasolo uma lava i luga o fesootaiga faainitaneti, e faailoa mai ai lava e le tamaitai ia lona tagata ma vaega uma e tusa ai o mana’oga o le tauvaga. Mai le to’aono na faaulu mai suafa, na filifilia ai loa le to’atolu e fai i ai le faai’uga mulimuli a le laulau o faamasino. 

Peitai mulimuli ane ua toe faaui i tua le suafa o se tasi o tamaitai e to’atonu i ai le vaega o finalists, ona o ni mafuaaga tau lona aiga, lea la a totoe mai ai na o le to’alua e pei ona mua’i ta’ua, lea o le a faia i ai le faaiuga i le Aso Faraile, 29 Iulai, i le 6pm i le afiafi. O le a faia lenei faamoemoe i le Fale Samoa i Magele. 

Mo le filifiliga faai’u, e LUA vaega o le a tulimata’ia e faamasino, o le TALENI ma le FAATALANOAGA (interview) o le a faatino ai lea afiafi. E mae’a lena ona faatino lea e tamaita’i ta’ito’atasi a la Taualuga i se saasaaga faa-Samoa. 

O le tamaitai o loo tauaveina nei le pale o le Miss Samoa NZ, le tausala ia Fonoifafo Nancy McFarland-Seumanu o le a ia faapaleina le tamaitai o le a manumalo mai lea afiafi e faaauauina ona tauave le pale o le tausala Samoa i Niu Sila nei. 

O le tausaga foi lenei e atoa i ai le 31 tausaga talu ona faavaeina le Miss Samoa NZ i Aukilani Niu Sila.