Ua iai nei se fuafuaga a le malo e taofia mo se taimi e lē umi, le faaauauina o galuega o le poloketi miliona, ae se’i faatino le galuega o le su’eina o aseta uma ma faamaumauga o loo taatia ai lea poloketi a le malo a o le’i faamutaina, ina ua alo le atunuu i lana faigāpalota i le faai’uga o le masina o Aokuso.
Ua faailoa e le Minisita o Tupe o loo avea ma Sui Palemia e tāua tele lea galuega ona e iai Fono Faavae ua lē toe filifilia e itumalo i le palota tele nisi sa avea ma ta’ita’ifono o Fono Faavae, o loo iai foi nisi o matāupu e tatau ona faatulaga i se taotoga lelei e pei o ofisa o nisi Fono Faavae ua fausia i fanua o nisi sa umia tofi ta’ita’ifono ma sa seei i tofi Faipule o itumalo.
Le finagalo o le Sui Palemia ma le Minisita o Tupe i le feiloa’iga ma tusitala ma le ‘aufaasalalau, ae o le feiloa’iga foi lea i le Aso Faraile ua mavae sa fesiligia ai i sona lagona i le toe pale atu o le faigāmalo a le Faatuatua i le Atua Samoa ua Tasi i le mae’a o le palota tele, ma ua toe ave iai le faatuatuaga na te tauaveina ai le Matāgaluega o Tupe o se matāgaluega sa avea ai o ia ma ulua’i tama’ita’i faipule na filifilia iai i le faigāmalo a le Faatuatua i le Atua Samoa ua Tasi i le ta’ita’iga a le afioga Fiame Naomi Mataafa.
Ae e pei ona silafia na fetuuna’i le Kapeneta i lea taimi ma suia ai le Minisita o Tupe ae faasee atu le sui faipule tama’ita’i o Palauli 1 e avea ma Minisita o le Matagaluega o Tinā ma Tama’ita’i, Atina’e o Afio’aga ma Agafesoota’i.
Le afioga Mulipola Anarosa Ale Molioo o le Sui Palemia ma le Minisita o Tupe.
