O le faailogaina o le aso fanau ua atoa ai i le aso muamua o le masina nei o Iuni le 5 tausaga talu ona faavae ma faatū le pati faaupufai o le Faatuatua i le Atua Samoa ua Tasi, na faailoa ai e le ta’ita’i o le vaega faaupufai, itumalo e 27 ua faamautū sui tauva, ma o nisi o sui faatutū ua mae’a momoli atu, ae o loo tālia le taimi e momoli atu ai isi sui faatutū.
O nisi o ia itumalo sa faailoa e le ta’ita’i le susuga Laauli Leuatea Polataivao Fosi Schmidt, e silia i le to’alua sui tauva peita’i ua iai itumalo ua tafa finagalo e faaui i tua ae tapua’ia le sui e to’atasi.
O le folasaga a le susuga Laauli i le faailogaina o le 5 tausaga o le latou pati faaupufai, na ia faailoa ai le tauva o se tasi sa avea ma faipule o le Faatuatua i le Atua Samoa ua Tasi mo le itumalo o Salega 2 le afioga Fepuleai Faimata Su’a i le itumalo o Faasaleleaga 1.
E le’i faailoaina e le ta’ita’i le mafua’aga o lea suiga, peita’i o itumalo ua iai sui faatutū o le FAST ua aofia ai itumalo sa seei mai ai le ta’ita’i o le vaega faaupufai e puipuia aiātatau a tagata, ma le itumalo faapalota o Lotofaga sa tula’i mai ai le afioga i le Palemia o le malo tausi.
O itumalo la ua iai sui faatutū o lea vaega faaupufai e ese mai i le to’a 20 o i latou sa avea ma faipule ma tumau pea le lagolago i le pati, o Faasaleleaga 1, Faasaleleaga 5, Vaisigano 2, Palauli 3, Vaa o Fonoti, Safata 2, Lotofaga, Gagaemauga 1, Salega 1, Aana Alofi 2, Aana Alofi 3, Aana Alofi 4, Lepā, Anoamaa 1, Anoamaa 2, Sagaga 1, Sagaga 2, Sagaga 3, Satupaitea, Gagaifomauga 1, Faleata 3, Vaimauga 1, Vaimauga 2, Vaimauga 4, Aleipata Itupa i Luga, Falelatai ma Samatau.
O isi itumalo e pei o Aleipata Itupa i Lalo, Faleata 2, Vaisigano 1 ma Vaimauga 3 ua faailoa e le ta’ita’i o le Faatuatua i le Atua Samoa ua Tasi o loo faatalatalanoa pea ni o latou sui e tauva mai i ia itumalo faapalota.
