Na amata faitau i le Aso Gafua o le vaiaso nei le sefulu aso talu mai ona faailoa lautele le i’uga aloa’ia o le faigāpalota a Samoa, ua avanoa ai ona tuuina atu ni talosaga poo ni tagi o moliaga o ni faigā solitulafono e faasino i faatosina na aliali mai i le palota a le atunuu.
O lea sefulu aso e pei ona faailoa e le Ofisa Sili o le Matāgaluega o Faamasinoga ma le Faafoeina o Matāupu tau Faamasinoga e mae’a i le Aso Faraile o le vaiaso a sau.
O ni matāupu o le a faaulu atu i le faamasinoga ua faailoa foi e le Ofisa Sili le susuga Papalii John Taimalelagi Afele ua iai se finagalo o le afioga i le Faamasino Sili, o le a aumai faai’uga tusitusia i le gagana Samoa ma le gagana Peletania.
O se tasi o vaega o le tautua a le faamasinoga ua faamanino e le Ofisa Sili, o talosaga e sefulutasi ua faaulu atu mo le toe faitauina o faaiuga o le palota mo nisi o itumalo.
O lea galuega ua na’o le faamasino ma tagata faigaluega o le faamasinoga, o failautusi a sui tauva ma le komesina o faigāpalota.
Ua faaalia e le Ofisa Sili le susuga Papalii John Taimalelagi Afele, e lē faatagaina ai le autusitala ma le lautele o le atunuu ona o aiaiga ia o le tulafono o faigāpalota o le tausaga 2019.
