Ua faailo e le ta’ita’i o le vaega faaupufai o le Faatuatua i le Atua Samoa ua Tasi se tasi o fuafuaga a lea patī faaupufai pe a toe filifilia e avea ma faigamalo i le mae’a o le palota aoao ia Aokuso.
O le gagana lafo ma isi gaioiga ua faaaogā ai e nisi fesoota’iga televavave le social media e osofa’i ai isi tagata, ua faaalia e le ta’ita’i le susuga Laaulialemalietoa Polataivao Fosi Schmidt o le a faatino iai se galuega.
E pei ona silafia o se suiga tele lea i auala o fesoota’iga faaonaponei, ona ua avea le sa’olotoga tuusaunoa o tagata e faaaogā ai ia fesoota’iga, ma avanoa ua faatino ai ma isi ituaiga o solitulafono e māfua i le faaaogāina o ia auala o fesoota’iga.
O se finagalo o le susuga Laaulialemalietoa Polataivao Leuatea Fosi Schmidt i lana folasaga i le a’oa’oga a tusitala ma le ‘aufaasalalau e tapena ai le faasalalauina o le palota tele o loo loma a Samoa.
O le vaega foi lea o le a’oa’oga a tusitala e tapena ai mo le lipotiina o taualumaga o le faigāpalota na feiloa’i ai ma le ta’ita’i o le vaega e puipuia aiā tatau a tagata, le susuga Tuilaepa Lupesoliai Sailele Malielegaoi.
E le’i maua le avanoa o ta’ita’i o isi pati faaupufai sa oo iai le valaau faaaloalo.
