A o tālia le galuega ua toe faitau ai e le faamasinoga faai’uga o palota a nisi o itumalo e māfua i ni talosaga sa faaulu i le faamasinoga faaitumalo, o le aso ananafi e tusa o lipoti a le auaunaga faasalalau o le Samoa Global ua faailoa ai, e lima itumalo ua faamautū pea faai’uga sa iai i le faitauga aloa’ia.
Ua faamausalī le filifilia o ia sui mo itumalo e aofia ai Aleipata Itupa i Luga, o Aiga i le Tai, Faasaleleaga 1, Gagaifomauga 2, ma Alataua i Sisifo.
O nofoa o ia itumalo sa manumālō mai ai le vaega faaupufai o le Faatuatua i le Atua Samoa ua Tasi.
O loo tālia nei faitauga o palota mo isi itumalo e 5 e aofia ai Faasaleleaga 5, Satupaitea, Aana Alofi 2, Aana Alofi 3, ma Sagaga 3.
A o faagasolo lea galuega sa mana’omia e nisi o faamasino o loo gafa ma lea galuega ni māfua’aga tusitusia e tuuina atu e loia a sui tauva ua talosaga, e faailoa ai māfua’aga o le mana’omia o se isi faitauga i luma o le faamasinoga.
