O le vaegatupe o le faamanuiaga tau inisiua a le malo na totogi mai e le kamupani o le Pacific Catastrophe Risk Insurance company ua iai le faai’uga a le malo tausi e taatia lona faaaogāina i le tala faatatau autū o le tupe a se faigamalo fou o le a filifilia i le mae’a o le palota tele a le atunuu.
Ua faailoa e le Minisita o Tupe o le malo tausi le afioga Lautimuia Uelese Vaai i auala o faasalalauga a le malo o le faaaogāina o lea vaegatupe e tusa ma le 771 afe 847 tālā Samoa i le fuafuaga fou o le tupe a le malo e faavae i le lipoti a le komiti o faalavelave faafuase’i a le malo o le a faailoa ai vaega tonu na afaina i le maualuga o le galu na aafia ai se vaega o le atunuu ona o le galulolo poo le sunami na mafua mai i le mafui’e e 8 tesimale 8 lona malosi na lūlū i le aso 30 o Iulai ma afaina ai se vaega o le atunuu o Rusia.
O le vaiaso ua mavae na tauaao atu ai lea seleni i le Minisita o Tupe o le malo tausi e se sui o le kamupani o le Pacific Catastrophe Risk Insurance company.
O loo faamaopoopo le lipoti a le komiti o faalavelave faafuase’i e iloa tonu ai poo ā vaega na faaleagaina i le galulolo, ae e pei ona silafia e iai vaega o le tatou atunuu na lofia fale i le maualuga o le suasami.
