Ua tele tala mai Amerika, ua faailoa ai le ave faamalosi o le to’atele o tagatānuu eseese ma totonu o Amerika, aemaise lava i tagata Latina, ae o lea ua sau ai ma tala o le taofia ai e sui o le matāgaluega o femalagaa’iga a Amerika o se tinā Niu Sila e suafa ia Sarah Shaw, ma si ana tama tama e na o le 6 tausaga le matua.
E tusa ai ma lipoti mai leitio faavaomalo na faamatala ai e le tama’ita’i ia Sarah tulaga faamomoiloto na feagai ma i la’ua.
Ta’ua e Sarah, o ia ua alu ane lona fefe tele, e pei ua ave faagaoi i la’ua poo le kidnapped ma avatu i se taavale o se van pa’epa’e, e foliga e leai se laisene o lea taavale, i itu tuaoi o Kanata.
Faamauina na tula’i lea matāupu i le 3 vaiaso talu ai, a o taumafai Sarah Shaw ma si ana tama o Issac e ulufale i le Iunaite Sitete o Amerika, ina ua toe foi ane mai le la malaga sa aga’i ai e momoli isi o fanau a lea tama’ita’i Niu Sila i Vancouver i Kanata i le aso 24 o Iulai.
E ta’ua o lea o loo taofia Sarah i le tasi o nofoaga i le Setete o Texas, ae na faailoa e le faauō a le tama’ita’i i le leitio faavaomalo a Niu Sila, na manatu lava Sarah o loo sologa lelei pea vaega uma i itu tau femalagaa’iga, ae i se taimi mulimuli ane ina ua maua se fesoota’iga ma lea tama’ita’i na ia ta’ua ai e na te lē o iloa lava se mafua’aga ua ala ai ona tula’i mai lea faafitauli.
Ma sa ia ta’ua e le’i iai sona manatu o loo taofia i la’ua.
Faamanino e Sarah i lana faauo o Victoria, o loo atoatoa lelei o la pepa malaga ma si ana tama o Issac, o lona uiga o loo taofia faasolitulafono nei i la’ua e Amerika.
Faamanino e le Matāgaluega o le Va i Fafo, ua oo atu lea matāupu, ma o loo latou talosagaina nei ni faamaumauga ma faamatalaga e tusa ai ma lea faafitauli, ona e ta’ua e le Minisita ia Vaovasamanaia Winston Peters i le taimi nei, e lē o lava ni faamaumauga e faasolo ai a latou gaioiga.
Puna o Faamatalaga: https://www.rnz.co.nz/news/national/569737/nz-woman-sarah-shaw-and-six-year-old-son-detained-by-us-immigration
