O le vaiaso na te’a nei na maitauina ai le vāvāō ai ma tapisa luga o upega tafa’ilagi, ma lipoti i se tinā Kiwī ma lana tama e 6 tausaga le matua, na taofia i itu tuaoi o Kanata ma Amerika, ae o lea ua oo mai faamatalaga i se tasi o alii pese talavou iloga a Niu Sila, o Lotima Nicholas Pome’e poo General Fiyah e iloa ai e le to’atele.
Ua lipotia le taofia ai o ia i le Iunaite Setete, ma ua toe tipoti mai i Niu Sila, ma o se tala na faate’ia ai le to’atele.
O General Fiyah, na faimalaga atu mo Uosigitone Amerika mo se tasi o faatasiga tele, o se fiafiaga e faasino lea mo tagata Pasefika, Polyfest i le Aso Toonai, le faai’uga o le la vaiaso, peita’i e le’i faataunuuina faamoemoega uma a lenei alii talu ai lenei faafitauli.
I se tusitusiga a le alii pese na ia faailoa ai lona faanoanoa tele i le lē mafai ai ona ia auai i lenei faatasiga tāua, ma lē mafai ona faafiafia mo le to’atele, aemaise mo nai tagata o loo lagolagoina pea o ia ma ana taumafaiga.
E lē o mailoa tonu poo le ā le mafua’aga na taofia ma toe faafoi mai ai lenei alii i Niu Sila.
Ae i le tele o faamatalaga ma tusitusiga a tagata i luga o le social media, na fesiligia ai e se tasi poo le ā le mafua’aga ona o lenei alii o se tagata Tonga.
Mo le silafia o Lotima Nicholas Pome’e o se tagata Tonga na soifua ma ola a’e iinei i Niu Sila.
Ma ua tapisa le to’atele ma fesiligia lea itu ona o le sā poo le tapu a Amerika ua tuuina mai i atunuu e 36 e aofia ai ma Tonga, ua tapu ona toe ulufale atu ona tagatānuu.
Puna o Faamatalaga: https://www.rnz.co.nz/news/national/570244/nz-reggae-artist-general-fiyah-detained-in-us-and-deported
