Ona o le malosi tele o le mafui’e na tula’i mai i itu o Lusia, o lea lava na logo ai le tele o ogasami ma atunuu, e pei ona iai Iapani, Pasefika ma oo lava i itu o Amerika. 

I Aotearoa nei o lea na mata’itūina lava tulaga o le malolosi o galu i gataifale o le atunuu.

O lea na maitauina lava le oo mai i le taeao nei o tuu mai lapata’iga a le vaega o le vaaitau faapea sui o auaunaga o faalavelave tutupu faafuase’i i tagata lautele ina ia faamuamua pea le saogalemu, ina ia alo ‘ese mai le aga’i i matāfaga ma itu lalata i le sami.

Fautuaina e lē o se taimi e tatau ona aga’i ai mo ni matamataga. 

Faailo e sui o le vaega o puipuiga lautele poo le Civil Defense, e tatau i tagata ona ave le latou faamamafa i aafiaga i le tagata.

E lē o se vaega e tatau ona manatu māmā iai le tagata ona o se matāupu ma’ale’ale ma o se matāupu e aafia ai le soifua ma le ola o le tagata. 

Na maitauina le tuuina mai ai o fautuaga i tagata o loo iai vaaafi, ma vaa la’upasese, e pei ona taofia ai faigāmalaga ma le aga’i mai o vaa ona o faaeteetega i aafia i galu malolosi.

I Ueligitone, na māua ai le lē faataunuuina o faigāmalaga mai le uafu, aga’i i le taulaga ma Eastbourne, ma e ta’ua na faato’ā tatala femalagaa’iga i le itula e 10 i le taeao nei.

Puna o Faamatalaga: https://www.rnz.co.nz/news/national/568505/commuter-ferry-cancelled-warnings-to-sightseers-as-first-tsunami-currents-reach-nz