E lē o mālōlō lava galuega faatino a le Matāgaluega o Leoleo i le taumafai lea e taofia le tele o gaioiga faasolitulafono mai le tula’i mai, aemaise lava o le ofi mai ai o fualaau ma pauta faasāina i totonu o aai o Niu Sila.
E pei ona iai se tasi o galuega a le matāgaluega na faatautaia i faaitu o Matamata-Piako.
I lipoti ma le NZ Herald e faapea, o lenei galuega na aga’i tonu lea i le taofia ai o gaioiga a nisi o loo masalomia i le sapalai mai ma aumai i totonu o le atunuu o fualaau faasāina.
Māua i lipoti, i le osofa’iga na faatautaia e leoleo i Matamata, na maua ai se laau malosi i lona ituaiga o le pump action shotgun, o tupe e oo atu i le $20,000 ma pauta faasāina o le cocaine faamauina e sili atu ma le ‘afa kilokalama le mamafa, ma le 1 le afifi o lea lava pauta faasāina e 28 aunese le mamafa.
E 39 tausaga o le alii o loo taofia nei i lalo o le vaavaaiga a leoleo, o le a tālia lona tula’i ai i luma o le Faamasinoga Faaitumalo a Hamilton, i le aso 28 o le masina nei.
Ta’ua o moliaga e ono molia ai, o moliaga e fesoota’i i nakoti ma umiaina o ‘au’upega mata’utia.
O loo faamauina foi le ono iai o nisi o moliaga e faaopoopo i lea matāupu.
Puna o Faamatalaga: https://www.nzherald.co.nz/nz/waikato-drug-operation-cocaine-cash-gun-seized-by-police/
